♥ 我想回家啊!

 

   【28/8/2010年(六) 下午1:33分】

     這一刻忽然狂風暴雨~行雷閃電...

     成個天都黑晒,好可怕啊!

     (好少見下午都出現呢啲景像)

     從廚房出面傳來"吱吱"叫聲,抬頭一望...

     原來有隻雀仔喺抽油煙機條喉管上避雨! :) ↓

      我好小心攞起相機(開始用相機影相)→ 

 
     想影低正在避雨嘅雀仔(當時個心卜卜跳)

     因為街外嘅雀仔好怕人類,好多時想同佢哋打個招呼...

     嘩!只要一舉起手咋...嚇到啲雀仔雞飛狗走!

     如果今次唔係狂風暴雨...跟本冇可能影倒相!

     但又怕嚇親隻雀仔,只係舉高手隨便影一兩張相就算啦!

     當睇番啲相,只係喺玻璃鏡到睇倒雀仔嘅影子...

     雀仔牙,我唔影喇!避完雨先走啦!小心呀...


   【後記】

     曾幾何時,抽油煙機條喉管時常寄居不知名嘅雀仔!

     記得有一次炒緊餸,咦!點解拎住碟隻手涼涼哋嘅?

     噢!原來有對雀仔夫婦,建設緊"愛的巢穴"

     嗰啲樹枝~樹葉~乾木~紙碎~繩索...等等!

     塞住條喉管,啲風就倒流...跟本抽唔到啲油煙出街外。

     又或者開抽油煙機嘅時候,呼一聲...啲樹枝樹葉同雀仔...

     喺喉管入面一齊飛咗出嚟,好好笑,但又有啲唔好意思!

     因為事後啲雀仔又要好努力,用口擔住起雀巢嘅材料...

     喺喉管到好忙~好忙咁飛出飛入...起起吓個雀巢~~

     又畀我拆除...再起...我又拆(其實我同啲雀仔都好忙啊)